नेपाली हास्यव्यङ्ग्य अनलाइन पत्रिका

ईश्वर पोखरेल :

परीक्षामा उतीर्ण हुनु भयो ? बधाई छ । परीक्षामा अनुतीर्ण हुनुभयो ? बधाई छ । भनिरहनु नपर्ला; पहिलो बधाई मैले मेरो विदेशी विश्वविद्यालयबाट सम्बन्धन प्राप्त अन्तर्राष्ट्रिय स्तरको ‘इन्टरनेसनल हाइयर एजुकेसन एण्ड क्याम्पस’को तर्फबाट दिएको हुँ भने दोस्रो बधाई मेरो ‘शतप्रतिशत उतीर्ण कोचिङ्क सेन्टर’को तर्फबाट ।

सर्वप्रथम पहिलो बधाईको केही विस्तारमा चर्चा गरौं । यो बधाई स्वीकार गर्न तपाईले आनाकानी गर्नै पर्दैन; यो बधाईको खाट्टी र एक मात्र हकदार भनेकै तपाई हो । मैले सबैलाई यस्तै भन्दैआएको छु; तपाई किन छुट्नु हुन्छ ? वास्तवमा तपाईले प्राप्त गर्नु भएको यस परिणामले तपाईकोे कुशलतालाई स्पष्ट रूपमा देखाउँछ । पढेर पास हुनु भएको भए, यसले स्पष्ट गर्दछ : तपाई एक होनहार विद्यार्थी हुनुहुन्छ ।

चोरेर पास हुनु भएको भए यसले अझ स्पष्टसंग देखाउँछ : तपाई यो महत्वपूर्ण कलामा पारङ्गत हुनुहुन्छ । जगजाहेर छः चोर्नु आफैमा एक कला हो । कतिपय अकुशल अभागी चोरहरू चोर्दाचोर्दै पक्राउ पर्छन् । जस्तो, हिजो हाम्रो टोलका ठिटाहरूले एउटा पटके चोरलाई दराज फोर्दाफोर्दै फेला पारेछन् । त्यसपछि त्यसको हालत के भयो : तपाई आफै अनुमान गर्नुहोस् । तपाईको त्यस सगोत्रीकोे त्यस अवस्थाको सबिस्तार वर्णन गरेर प्रारम्भिक चरणमै रहेको मेरो तपाईसंगको सम्भावित सुमधुर सम्बन्धलाई यति चाडै बिगार्न चाहन्न । मेरो आग्रह के मात्रै हो भने, कृपापूर्वक मेरो बधाई स्वीकार गर्नुहोस् र मेरो अन्तर्राष्ट्रिय स्तरको ‘इन्टरनेसनल हाइयर एजुकेसन एण्ड क्याम्पस’ मा सरासर पाल्नुहोस् ।

मेरो ‘इन्टरनेसनल हाइयर एजुकेसन एण्ड क्याम्पस’को थातथलो फेला पार्न सकिदैन कि भनेर तपाईले सोच्नै पर्दैन, शिक्षाको उज्यालो घामबाट कोही बन्चित हुनु नपरोस् भनेर हामीले तपाईको गाउँटोलमै बिचौलियाहरू नियुक्त गरेका छौं । हाम्रा बिचौलियाहरू हाँसकुखुराको मोलतोलमा बढी ब्यस्त रहे र स्तरीय र प्रभावकारी सेवा प्रदान गर्न चुके भने, कृपया, हामीलाई फोन गर्नुहोस्‌; हाामी तपाई घरमा हुनुहुन्छ भने घरमै, मामाघरमा हुनुहुन्छ भने मामाघरमै, पार्कमा हुनुहुन्छ भने पार्कमै, क्याबिन रेस्टुरेन्टमा हुनुहुन्छ भने क्याबिन रेस्टुरेन्टमै, जहाँ जतिबेला भन्नु हुन्छ त्यही, त्यतिबेलै लिन आउँछौं । नजिकै हुनुहुन्छ भने गर्लफ्रेन्ड, ब्यायफ्रेन्ड जो जे छ; साथसाथै पाल्नु भए हुन्छ : स्वागत छ ।

अब दोस्रो बधाईको चर्चा गरौं । स्पष्टै छ : यो बधाई तपाईले आफ्ना बाबुआमा र गुरुहरूलाई हिस्स पार्न सकेको कारणले प्राप्त गर्नु भएको हो । तपाई खाट्टी प्रजातन्त्रवादी हुनुहुँदोरहेछ : बाबुआमा र गुरुहरूलाई हिस्स पारेरै तपाई बहुमतको पक्षमा उभिनु भो । साँच्चै भनौं भने यस रिजल्टले देखाउँछ, तपाईमा एक होनहार भावी राजनीतिक नेताका लक्षणहरू भरमार छन् । हाम्रो सन्दर्भमा अनुतीर्ण हुनुको सोझो र स्पष्ट अर्थ राजनीतिमा प्रवेश गर्ने ‘इन्ट्रान्स’ उतीर्ण हुनु हो । ढुक्क भए हुन्छ : तपाई बहुमतमा हुनुहुन्छ । हामी यस्तो बहुमत आउँदा दिनमा पनि तपाईंलाई सहज रूपमा प्राप्त होस् भन्ने कामना गर्दछौं । प्रजातन्त्रमा बहुमतले शासन गर्दछ ।

तपाई पहिले मुलुक सञ्चालनको ‘ताल–साँचो’ ग्रहण गर्नुहुन्छ कि आठ कक्षा उतीर्ण गरेकोे प्रमाण पत्र ? दश कक्षा उतीर्ण नगरीकन पनि हामीकहाँ सत्ताको सिढीं चढ्न मिल्छ । हामीकहाँ खरिदार हुन योग्यता चाहिन्छ, मन्त्री हुन होइन । तैपनि देश र समाजका लागि बाह्र कक्षा पास भइदिन चाहनुहुन्छ भने हाम्रो कोचिङ्ग सेन्टरमा पाल्नुहोला ।

हल्का मेहनतले उच्च सफलता कसरी प्राप्त हुन्छ : यो हामीलाई थाहा छ । तपाई हाम्रो ‘ट्रिक’ ग्रहण गरेर जस्तै ‘मै हुँ’ भन्नेलाई पनि पछार्न सक्नुहुन्छ । यो हाम्रो दावा हो । एस. एल. सी. पास गर्ने सरल र ‘सट–कट’ बाटो हामीले पत्ता लगाएका छौं र त्यो तपाईलाई बताउन पाउँदा हामीलाई खुसी लाग्नेछ ।

अतः यो पालीको जाँचमा अनुतीर्ण हुनु भएकोमा हाम्रो बधाई स्वीकार गर्नुहोस्, कृपापूर्वक हाम्रो कोचिङ्ग सेन्टरमा पाल्नुहोस् र आफ्नो सुरक्षित भविष्यको ‘कोठाचोटा’ रङ्गाउनुहोस् । हाम्रो कोचिङ्ग सेन्टर तपाईलाई हार्दिक स्वागत गर्दछ ।

०००
बोझेपोखरी, ललितपुर