नेपाली हास्यव्यङ्ग्य अनलाइन पत्रिका

कृष्णदेव रिमाल :

सबै सँगै :
तेरो लोग्ने जँड्याहा मेरो जुवाडे
बाह्रमासे साँडाले घर घडेरी गाडे
जाँड धोकी फर्किंदा ठ्याक्कै वन ढाडे ।।२

एउटी :
किताब किन्ने पैसा छैन भुत्रो हुन्छ सान
मस्टरसाहेब आएर बटारदिए कान
तेरो छोरो रुँदैछ गोदाइ खाँदैछ
स्कुल बंक हानेर घुम्न जाँदैछ ।।२

सबै सँगै :
तेरो लोग्ने जँड्याहा मेरो जुवाडे

अर्की :
तेरो छोरो कुर्कुरे बैंस आएर
कोठीहरू जता छन् उतै धाएर
स्त्रीलम्पट भैसक्यो केको गर्नु काम
तँहामीको मस्ती गल्दा क्यारी खाला माम ??२

सबै सँगै :
तेरो लोग्ने जँड्याहा मेरो जुवाडे …।

झन अर्की :
तँ पनि त के कम छेस वाइन लाउँछेस
बेसुरामा उल्टोपाल्टो गीत गाउँछेस
मध्येरात घर्केसी बल्ल आउँछेस्
भरोदिन नक्कल पारी कता धाउँछेस् ?२

सबै सँगै :
तेरो लोग्ने जँड्याहा मेरो जुवाडे …..।

अझै अर्की :
परिवार स्वाहा भो देशै स्वाहा भो
मियो लुलो हुनाले सबलाई आहा भो
संधैभरी पाल्ने कि फाल्ने विकृति
यो हिमाली भूमिको के भो संस्कृति ।२

सबै सँगै :
तेरो लोग्ने जँड्याहा मेरो जुवाडे ….।

०००
काठमाडौं