नेपाली हास्यव्यङ्ग्य अनलाइन पत्रिका

लौ हजुर सिटामोल आयो
आयो है हजुर आयो
बूुढो रूको फेदमा आउनुहोस्
सरकारको भजन गाउनुहोस्
माईक्रोफोन स्टेण्डमा लाउनुहोस्
प्रवक्ता मन्त्री आउँदै हुनुहुन्छ
सिटामोलको गीत गाउँदै हुनुहुन्छ ।

के रे ? कुरा बुझिन रे ?
कुरा बुझ्ने गरि बोल्दा
खोप्ने मान्छे छ खोप छैन
सिरिन्ज छ त्यसका मुखमा लाउने छोप छैन
जे एण्ड जे खोज्दा बुस्टर आउँछ
बुस्टर खोज्दा जे एण्ड जे पाउँछ
यता कार्ड बेगर कतै पस्न नदिने
उता खोपलाई ठाउँमा बस्न नदिने
पचिस लाख डोज मुसाले तानेछ
अझै कतिलाख कपाकप खानेछ
मुसा मार्ने काम गर्नु हुँदैन ।
सिटामोल माईकमा आउछ हजुर
नखाई नखाईत मर्नु हुदैन ।

आयो हजुर अयो सिटामोल आयो
अलिकति भन्सारले खायो
अलिकति ठेकदारको मान्छेले पायो
अलि धेरै त राणाको जुवाईलेनै उडायो
उब्रेको आसेपासेले मोटरमा गुडायो
सिटामोल छ भन्ने प्रमाण कागजपत्र साक्षी छ
ट्याब्लेट चाहिँ मन्त्रीलेनै खाइसकेछन हजुर
खोस्टा चाहिँ दराजमा अझै बाँकी छ ।

लौ हजुर सिटामोलको खोस्टा आयो
मुख आँ गरेर तातो पानी पिउनुहोस्
सिटामोलको खोस्टा हेरेर जिउनुहोस्
लौ आयो हजुर सिटामोल आयो
टेलिभिजन भरि आयो
रेडियो भरि आयो
ज्वरो आउनेले टिभी र रेडियोमा लाइन लाग्नुहोस्
समाचार भन्नेसँग सिटामोल माग्नुहोस्
आयो हजुर आयो सिटामोल आयो ।

काठमाडौं