नेपाली हास्यव्यङ्ग्य अनलाइन पत्रिका

झिप्प बत्ती निभ्यो खोज्न थालेँ दियो
दीपिका उल्टियो तेल नै पोखियो
रेडियो बन्द भो सुन्नुपर्ने थियो
आज के बेचियो बुझ्नुपर्ने थियो ।

ध्यान गर्ने गुफा हो कि लाग्यो घर
ध्यान गर्दै भनेँ देश फिर्ता गर
जन्मभूमि थियो हैन जस्तो भयो
बन्धकी हो कि यो दाइजोमा गयो !

वर्ण दिन्छौ तिमी लिङ्ग दिन्छौ तिमी
जात दिन्छौ तिमी धर्म दिन्छौ तिमी
वर्गसङ्खर्षका मर्म दिन्छौ तर
माग मेरो छ यो देश फिर्ता गर ।

शान्तिका खालमा रक्त छर्छौ तिमी
मेलका खेलमा झेल गर्छौ तिमी
न्यायका नाममा भ्रान्ति दिन्छौ तर
देश खै देश खै देश फिर्ता गर !

खोल्छु ढोका भनेँ बन्द गर्छौ तिमी
यी सिसा झ्यालका फोर्न थाल्छौ तिमी
नाच्तछौ बेतुके नित्य नाङ्गाे  हर
हे कलाकार हो देश फिर्ता गर !

काम छैनन् यहाँ स्वप्न दिन्छौ तिमी
अन्नका नाममा भोक छर्छौ तिमी
लाग्छ शङ्का सधैँ डुब्न लाग्यो घर
देशमा देश नै छैन फिर्ता गर !!

सानेपा, ललितपुर