नेपाली हास्यव्यङ्ग्य अनलाइन पत्रिका

रूखमा भोट हालेर
मने गयो मलेसिया
सूर्यमा भोट ठोकेर
धने उड्दैछ कोरिया

हँसिया र हथौडामा
भोट हाली हतारमा
बले पुग्यो हिजो मात्रै
काम खोज्दै कतारमा

पार्टीको कार्यकर्ता भै
भोट मागेर हिँड्दथ्यो
खुँडा र खुकुरी बोकी
पार्टीकै लागि भिड्दथ्यो

त्यो पल्लो गाउँको हर्के
जहान पाल्न खातिर
झोला बोकी रुँदै आज
लाग्यो रे साउदीतिर

उद्योग बन्द छन् सारा
खोल्दैन सरकारले
देश झन् थिचिएको छ
विदेशी ऋण-भारले

बिरामी वृद्ध बा आमा
एक्लै छोडेर गाउँमा
थाहा छैन कसैलाई
बिर्खे छ कुन ठाउँमा

अस्ति बाजा बजाएर
बिहे गरेर आखिर
भाँडा माझ्न हिँड्यो लाले
आजै ऊ इन्डियातिर

त्यो लाले अब फर्केर
कहिले घर आउला ?
श्रीमती घरमै देख्न
पाउला कि नपाउला ?

कल्पना कल्पना गर्थिन्
नौलो यो लोकतन्त्रमा
देशमै काम पाइन्छ
ल्याएको गणतन्त्रमा

छोडेर काखको बच्चा
रुँदैरुँदै कठैबरा
इज्रायल उडे अस्ति
कल्पना र बसुन्धरा

पार्टीका भ्रष्ट नेताले
आलोपालो गरीकन
देश यो टाट पल्टाए
दुख्छ यो कविको मन

नेपाली जनता हामी
पार्टी भन्दै अझै पनि
जिताउँछौ तिनै नेता
यो भन्दा दुःख के त नि ?

लमजुङ, हाल अमेरिका