देश, हड्डी र कुकुरहरू
यस कुरूप समयमा देखिन्छ यो देश भित्तामाथि झुन्डिएको थोत्रो मानचित्रमा हड्डीको एउटा टुक्रो जस्तै !
आतङ्कको एउटा डल्लो घाम
शिरहरूमाथि चर्को चर्किन्छ
गल्लीतिर हिंस्रक आकृतिहरू देखापर्छन्
कानहरूमा कर्कश भुकाइ ठोक्किइरहन्छ
ओइलाउँछ नयाँ बिहानको स्वागतमा
फुलेका कलिला कोपिलाहरू ।
दिलदिमागमा त्रासका किटाणु उड्छन्
र, फैलिन्छन्
रूखहरूमा चराचुरुङ्गीको चिरबिर बिथोलिन्छ
खेलिरहेका बच्चाहरू तर्सिन्छन्
तीखा तीखा दाँतहरू देखाउँदै
एकआपसमा लुछाचुँडी गरिरहन्छन्
चम्काउँदै रौद्र आँखाहरू
चपाइरहन्छन् परेवाका पखेटाहरू ।
यस कुरूप समयमा
देखिन्छ यो देश
भित्तामाथि झुन्डिएको थोत्रो मानचित्रमा
हड्डीको एउटा टुक्रो जस्तै !
(कवि गुरुङको कविता सङ्ग्रह ‘जब एउटा मान्छे हराउँछ’ भरखरै लोकार्पण भएको छ ।)