नेपाली हास्यव्यङ्ग्य अनलाइन पत्रिका

आस्था छ एकातिर
पहिचान (चिन्ह) छ अर्कातिर
काँध विपक्षीकै
बरु किन चढ्न नपरोस्
लौरी अर्काकै
बरु किन टेक्न नपरोस्
ऊ उमेदवार हुन चाहन्छ
घरदैलो गर्दै दुई हात जोड्न चाहन्छ
सधैं झंै, चुनावको नशामा ।

रक्सीको, जाँडको
गाँजाको, गुट्काको
र धुमपानको नशा जुन छन्
बरु त्यो मान्छेले त्याग्न सक्दो र’छ
तर नशा जुन लाग्छ चुनावको
कसै कसैलाई, त्यसले
बुढौली, बिमारी, अशक्तता केहि भन्दो रै’नछ ।

अवस्था जे सुकै होस्
त्यो त सधैं जागरुक हुँदो र’छ
उमेदको त्यान्द्रोले,
उसलाई सधैं जगाई राख्दो र’छ
अपशोच, उसको जुन चुनावी नशा छ,
देशको निम्ति आज त्यो दशा भैरा’छ ।

०००
असोज २५, २०७९