सपथ

अग्निलाई height=
साक्षी राखेर
जललाई {{read_more}}
सिंचन गरेर
भाकेको सपथ
आजभोलि
किन शिशा फुटेझैं
झर्याम्म फुट्छ ?!

गीता, कुरान
र बाईबललाई
हातले छोएर
सत्य, निष्ठा
र इमानको लागि
खाएको सपथ
आजभोलि
किन टुङ्ग्नाको
तार टुटेझैं
कड्याक्क टुट्छ ?!

अनि संबिधान
शिरमा राखेर
देश र दुनियाँको
हितको लागि
खाएको सपथ
सोझो रेखाका
पद(चिन्ह त्यागेर
बाहकहरू
किन बक्ररेखालाई
अँगाली रहेछन् ?!
विचार गर,
सपथको श्राप लाग्ला भनेर !

तर, डोल्मा र फुर्पाले
हिंउको चिसोमा
चौंरी चराउँदै
लाएको मायाँ पिरती
फुलमाया र पूर्णले
पहाडी भाकामा
घाँसदाउरा गर्दै
गाँसेको लगनगाँठो
अनि मधेसको गर्मीमा
फूलमती र रतनले
उखु र तोरीबारीमा
पसिना चुहाउँदै
संगसंगै बुनेको सपना
आहा ! कति सुन्दर
कति रहर लाग्दो !
त्यहाँ
न सपथ, न कपट
न घात, न प्रतिघात
चन्द्र–सूर्यलाई
साक्षी राखेर
खुल्ला आकाशमुनि
शुद्ध मनले
आफ्नो माया
र माटोको इज्जत
तिनैले जोगाए
र तिनैले जोगाई रहे
युग युगदेखि
युग युगसम्म !