नेपाली हास्यव्यङ्ग्य अनलाइन पत्रिका

जस्तो देखियो
चुनावको समीक्षा
त्यस्तै लेखियो ।

गाह्रो पार्दैछ
उनै नेता जित्दैछन्
देश हार्दैछ ।

न्याय खोसेर
हाम्रो देश खोक्रो भो
भ्रष्ट पोसेर ।

प्यारो नेपाल
पाँच वर्ष खेर गो
हुन्थ्यो कमाल ।

पानी उमाले
काङ्ग्र्रेस एमालेले
देश पखाले ।

यही सत्यता
भेडा, बाख्रा, ब्वाँसाको
देखेँ मित्रता ।

छेके दुवाली
देशमाराहरूकै
हालीमुहाली ।

चोया बाँसको
संसदका भेडामा
चिन्ता घाँसको ।

डोको चोयाको
मासु लुछे गिद्धले
देश रोएको ।

राज्य छट्टुको
त्यसैले हो नेपाल
सधैं टट्टु भो ।

कतै नि अब
जनताको मतको
छैन कदर ।

हामी बीच छ
ठूलाघरे नेताको
बुद्धि निच छ ।

देश जल्दछ
उत्तर दक्षिणको
हावा चल्दछ ।

खुट्टा मर्केका
नाम गठबन्धन
अन्तै फर्केका ।

भयो मंगल
बाघ पस्यो खोरमा
बाख्रो जंगल ।

बल्ल खाइयो
पुगेपछि गोर्खामा
न्याय पाइयो ।

आमा रुवाए
घाँस खाए भेडाले
देश डुबाए ।

चिप्ला कुराले
लठ्ठ परे जनता
जिते बुढाले ।

आशा तमासा
अब केही युवाले
देलान् धमाका ।

०००
कपन, काठमाडौं