नेपाली हास्यव्यङ्ग्य अनलाइन पत्रिका

दुर्गा भमरकोटे :

भाव भक्तिले
चाडपर्व मान्ने हो
यथाशक्तिले ।

बुझौँ ढंगले
दसैँ आयो भन्दैछन्
उड्ने चङ्गाले ।

गरेँ नमन
सबै पितृ देवमा
श्रद्धासुमन ।

पितृ उद्धार
सोह्रश्राद्ध आरम्भ
हुन्छ प्रारम्भ ।

श्रद्धा अर्पण
सम्झना बा आमाको
दिनु तर्पण ।

पितृ पक्षको
विसर्जन अन्त्यमा
जिम्मा रक्षाको ।

मेरो नमन
सुरक्षित दसैंको
शुभकामना ।

नवरात्रीः

घटस्थापना
नवदुर्गा भवानी
प्रतिष्ठापना ।

राम्रो सौभाग्य
शैलपुत्री आरोग्य
भर ऐश्वर्य ।

भक्ति प्रतीक
माता ब्रम्हचारिणी
पुजा विषेश ।

चन्द्रघण्टाको
मणिपुर चक्रमा
ध्यान गर्ने हो ।

जपे कूष्माण्डा
रोग दोष शोकको
अन्त्य हुने हो ।

दायाँ तिर छन्
देवी शान्ति मोक्षकी
स्कन्दमाता हुन् ।

कात्यायनीले
गर्छिन् मोक्ष प्रदान
अभयदान ।

कालरात्रीको
ललाटमा ध्यानले
भर्छिन् ज्ञानले ।

महागौरीको
अलौकिक सिद्धिको
पुजा विधिको ।

लिनुस् शरण
सिद्धिदात्री माताले
सिद्ध गरन ।

तिम्रै शरण
नवदुर्गा भवानी
रक्षा गरन ।

के के चाहिन्छ ?
कोजाग्रत ब्रतले
सबै पाइन्छ ।

नशा नसुकोस्
ठूलो पर्व दसैं यो
दशा नबनोस् ।

०००
कपन, काठमाडाैं ।