नेपाली हास्यव्यङ्ग्य अनलाइन पत्रिका

दुर्गाप्रसाद अधिकारी भमरकोटे :

मन्त्र गुनौं है
उपदेश बुद्धका
आज सुनौं है ।

जस्तै भएनी
सत्य बोल्नु पर्दछ
ज्यानै गएनी ।

फोर पहरा
हत्या अनि हिंसाको
हुन्न सहारा ।

मन नभाँड
अर्काकी महिलामा
आँखा नगाड ।

हरा वनमा
पराइको धनमा
पिडा मनमा ।

चोरी नगर
कर्म विना धनको
भर नपर ।

झुक्दै झुक्दैन
सत्यता त सत्य हो
लुक्दै लुक्दैन ।

हेलाँ नगर्नु
काम गर्न अरूको
भर नपर्नु ।

मान्छे सरिफ
ढलाउँन सक्दैनन्
झुठा तारिफ ।

डर नलिनु
अधर्मीलाई साथ
दिँदै नदिनु ।

बुझ यो सत्य
घृणा माथि प्रेमको
हुन्छ विजय ।

खुसी बाँडेर
कमी हुन्न कहिल्यै
तिम्रो जीवन ।

निशा ढाल्दछ
बलेको बत्तीले नै
दियो बाल्दछ ।

शंका नगर
तोडिदिन्छ मित्रता
पर नसर ।

चित्त नगाल
बितिसक्यो समय
खेर नफाल ।

पश्चातापमा
बितेको त्यो जिन्दगी
जल्छ रापमा ।

मन बेर्ने हो
केके गर्न बाँकी छ
त्यता हेर्ने हो ।

पिर हिजोको
वर्तमान सुधार
चोली भिजेको ।

रिस गरेर
जल्छ मान्छे आफैमा
चिन्ता परेर ।

सम्झ मित्र नै
सुख शान्ति समृद्धि
मन भित्र नै ।

बन्छ देउता
हजारौं शव्द भित्र
शान्ति एउटा ।

दुखी संसार
नियन्त्रण इच्छामा
सुखी बन्छ त ।

चिन्ता फगत
आफैंलाई चिन्नेले
जित्छ जगत ।

डाँडा कटाए
प्राप्त हुन्छ निर्वाण
दुख हटाए ।

के के गरिन्छ
धेरै गर्न बाँकी छ
भोलि मरिन्छ ।

छैन दानव
हत्या हिंसा नगर्ने
सच्चा मानव ।

ठान्छौ कजाएँ
रिस राग क्रोध हो
आफ्नै सजाय ।

सुन सज्जन
संगतले मानिस
बन्छ दुर्जन ।

हाम्रो गरिमा
फुके शान्ति विगुल
विश्वभरिमा ।

ज्ञानी जान्दछन्
बुद्धका उपदेश
सबै मान्दछन् ।

कस्तो योग यो
जन्म अनि मरण
एकै दिन भो ।

बुद्ध असल
गर्भ मायादेवीको
भयो सफल ।

०००
कपन, काठमाडाैं ।