नेपाली हास्यव्यङ्ग्य अनलाइन पत्रिका

घनश्याम रेग्मी :

फर्सीको झाल रोपिन्न करेसा झारले भरि
दैनिकै मासु भान्सामा पाकेको हुन्छ के गरी ?
आम्दानी शून्यको हुन्छ करोडौं खर्च हे हरि
पश्चगामी गरी यात्रा अगाडि पुग्नु के गरी ?

गफैले मार्दछन् बाजी गफैका हतियार छन्
विजेता मुखका मात्रै मुखैका मतियार छन् ।
सिन्को भाँचिन्न खै काम असरल्ल जतातता
देश चौपट पारेर भुलेका छन् यताउता ।

अँध्यारो नगरी हाय राज्य चौपट पारियो
ओल्लोपट्टि हराएर पल्लोमा खोज्न थालियो
सर्वज्ञरत्न छन् ज्ञाता ब्रह्माण्ड अन्तरिक्षका
गुड्डी हाँकेर थाक्दैनन् नीति माओ र माक्सका ।

ठेक्काको योजना आफ्ना मान्छेमा पार्न खप्पिस
अर्कालाई परे ठेक्का अल्मल्याए युगौँ तक ।
द्रव्यमोही भएका छन् नेताका धतुवाहरू
कर्मचारी बनेका छन् घुस्याहा लठुवाहरू ।

अवस्था के हुने होला भोलिका दिनमा अहो
छर्लङ्गै घाम लाग्ला वा भेलबाढी हुने कसो
कस्तो चित्र नयाँ कोर्छौ के होला देश आबरु
पुतली खेलमा मस्त सोच ए ! कुसुलेहरू ।

०००
बैजनाथ १, चिसापानी, बाँके