नेपाली हास्यव्यङ्ग्य अनलाइन पत्रिका

अग्ला पर्खालहरूका
चार घेरा र दिवारहरूमा
पालेहरूका पहरामा
बन्दुकका नाल तेस्र्याई
काँडे तारहरूले घेराई
बन्दी हुन्छन् दरवारहरू ।

बन्दी दरवारमा
राजाहरू बस्छन् भरमारमा
पर्खालमा दरवार बन्दी
दरबारमा राजा बन्दी
हावा छिर्दैन
मान्छे पस्दैन
विवेक बस्दैन
पसे विवेक पछारिन्छ
पसे विवेक मारिन्छ
विवेक निचोरिन्छ
विवेक चिथोरिन्छ ।

भुइँमान्छे झन पस्नै सक्दैन
सिफारिस चाहिन्छ
जो कोहिलाई कहाँ पाइन्छ ?
पस्न दरवारमा
जान्दैन भुइँमान्छे
खान्की दरवारको
बान्की दरवारको ।

भुइँ मान्छेले छाप लगाई
जनराजा बनाई
दरवार छिराएका नवराजालाई
भूपतिका नामले
पुज्छन् भक्तहरू
घुम्छन् वरिपरी शाक्तहरू
भाकल गर्छन्
बोका बली दिन्छन्
परदेश निर्मित अमृत जल छर्किन्छन्
अन्धा बनाउन
नवराजाहरूलाई दरवारमा ।

जन निर्मित राजाहरू
कहाँ देख्छन् जनहरू
कहाँ फिर्छन् मनहरू
भुइँ मान्छेका मतमा
अस्थायी भक्त पसेपछि तनमा ।

पाले पहरेहरूका सुरक्षामा
पस्दा पटक पटक भित्र
अन्धो हुन्छ मान्छे दरवार पसेपछि
विजयको अविर घसेपछि ।

पर्खालमा दरवार बन्दी
दरवारमा राजा बन्दी
दरवार र राजा दुबै
नजरानाका बन्दी
घरानाका बन्दी
आसेपासेका बन्दी
सान सौकतका बन्दी
जालझेलका बन्दी
द्रव्य दौलतका बन्दी
शाखा सन्तानका बन्दी
पर्खाल भित्र घेराबन्दी ।

०००
कैलाली