नेपाली हास्यव्यङ्ग्य अनलाइन पत्रिका

टोपी मेरो शीरको शोभा टोपी जिन्दगानी
घामपानी सहि बाँच्ने पुर्खाको निशानी
टोपी नै हो गौरब हाम्रो जस्तो सगरमाथा
युगौं युगदेखि प्यारो साँचेको यो गाथा ।

भूगोलबाट टाढा कतै जानु परे पनि
यो धर्तीको कुनै कुना बसाईं सरे पनि
टोपी नै त बन्छ हाम्रो चिनारीको साथी
टोपी लाउँदा फुक्छ मेरो गर्वसाथ छाती ।

हाम्रो पहाड जस्तै छ यो मेरो शीरको टोपी
दुई हातले उचालेर हिंड्छु शीरमा बोकी
मादलुको घिन्ताङ् सँगै टोपी लगाई नाच्छु
चिनारी नै यै हो मेरो टोपी लगाई बाँच्छु ।

भाइटीकामा लाइदिएको दिदी भाइको माया
उकाली र ओरालीमा बरको शीतल छायाँ
यहि नै हो टोपी मेरो पहराको छाती
टोपी नै हो जन्म मरण जिन्दगीको साथी ।

हाम्रो गीत लैबरीमा यै टोपी हो नाच्ने
यै माटोको सुगन्धमा बर्षौं बर्ष बाँच्ने
सगरदेखि सागरसम्म फैलिएको टोपी
हाम्रो मुटु हाम्रो धड्कन राख्छौं दिलमा छोपी ।

विश्वविख्यात हिमालमुनि बलिर’ने दियो
अरु केहि हैन प्यारो यै टोपी नै थियो
आज सारा दुनियाँमा बाल्दै मनको बाती
यै टोपीले चिनाउँदा फुल्छ हाम्रो छाती ।

सुख दुख मात्रै होइन शीरको शोभा राम्रो
जहाँसुकै जहिलेसुकै चिनारी हो हाम्रो
यसैले त आज यस्को उत्सव मनाउँदैछौं
नेपालीको गौरव गाथा गीत गाउँदैछौं ।

०००
गौरादह, झापा