भेट
र भगवानको घरमा भोकले चिच्याइरहेका थिए तिनै भवनले किचेका, मजदुरहरूको प्राण जहाँ जिउँदा लासमाथि राज गर्ने मालिक मरेका लासमाथि राज गर्ने भगवान् र सधैं मरिरहने मजदुरहरूको भेट हुन्छ ।
सुरज पराजुली :
निक्कै पहिला काठमाडौं आउँदा
उँधो मुन्टो लगाएर धरहरा हेर्दा
मलाई बडो अचम्म लाग्थ्यो
समयसँगै
आकाशलाई छेडेर, बादललाई च्यातेर
बन्दै गए, भवनहरू
देश विदेशमा थपिँदै जान थाले
धरहरा भन्दा अग्ला भवन
एकदिन केहि अग्ला भवनको
सबैभन्दा माथिल्लो तलामा सुनियो
निकै कहालीलाग्दो आवाज
मालिकहरूले झ्याल खोल्दा
झ्यालै अगाडि थियो
भगवान्को घर
र भगवानको घरमा
भोकले चिच्याइरहेका थिए
तिनै भवनले किचेका, मजदुरहरूको प्राण
बादलमाथि
भगवानको एउटा घर छ
जहाँ जिउँदा लासमाथि राज गर्ने मालिक
मरेका लासमाथि राज गर्ने भगवान्
र
सधैं मरिरहने मजदुरहरूको भेट हुन्छ ।
०००
सुनसरी