नेपाली हास्यव्यङ्ग्य अनलाइन पत्रिका

डिल्लीप्रसाद मुलतिहुन :

भक्त बन्नुभो बा विदेशको
रक्त चुस्नुभो आफ्नु देशको
खानुभो जहाँ त्याग्नुभो त्यहीँ
ज्ञानका कुरा सिक्नुभो यही । (५१)

बा स्वदेशको बासमा भुली
अन्य देशको फ्रेन काँचुली
तीव्र बेगमा लाग्न थाल्नुभो
छुद्र कामले जाग्न थाल्नु भो । (५२)

माकुराहरू पाल्नुहुन्छ बा
नाक देशको फाल्नुहुन्छ बा
दूध ख्वाएर साप पाल्नुभो
निम्न जोसुकै डस्न थाल्नु भो । (५३)

जाँड भाङमा बिक्नुहुन्छ बा
मातिदै कुरा झिक्नुहुन्छ बा
चाहियो अझै झट्ट बोतल
गन्ध आउने मातिने जल । (५४)

खेल्नुहुन्छ बा खेल घातक
जान्नुहुन्छ बा गर्न नाटक
झेल गर्नु नै खेल जित्नु हो
स्वाद क्या मजा खेल जित्नुको । (५५)

छद्म भेषमा डुल्नुहुन्छ बा
लोभ पापमा भुल्नुहुन्छ बा
धर्मको सभा भाँड्न थाल्नुभो
दाँत कोखमा गाड्न थाल्नुभो । (५६)

बा जुका बनी चुस्न थाल्नुभो
चेपचापमा घुस्न थाल्नुभो
बा जतासुकै पुग्न थाल्नुभो
गन्ध नाकले सुँघ्न थाल्नुभो । (५७)

बा छिमेकको भक्त बन्नुभो
आफ्नु देशमा प्वाल खन्नुभो
खोज्नुहुन्छ बा स्वादिलो गिलो
बेस मान्नुभो नर्कको हिलो । (५८)

रोज्नुहुन्छ बा ठाउँ ओसिलो
मार्नुहुन्छ बा बात जोसिलो
छोड्नु हुन्न ब यो छ आद्त
द्रब्यले दियो भिन्न यो मत । (५९)

देश भासियोस् या त मासियोस्
सोच राख्नु भो भ्रष्ट त्यो जिओस्
पक्ष भ्रष्टकै लिन्छु भन्नू भो
बा अचेल झन् भिन्न बन्नुभो । (६०)

०००
ओखलढुङ्गा, हाल- चाँगुनारायण भक्तपुर