नेपाली हास्यव्यङ्ग्य अनलाइन पत्रिका

अर्जुन पराजुली :

झगडा गरेरै फुर्सद छैन यहाँहरूलाई
पैसाले पानीट्याङ्की भरेरै फुर्सद छैन यहाँहरूलाई !
कसैलाई राजा ल्याउनु छ
कसैलाई गाँजा ल्याउनु छ !
कसैलाई आगो लाउनु छ सिंहदरबारमा
कसैलाई-
मान्छे मान्छेको बीचमा धाँजा ल्याउनु छ !
भएजति छेपारोको रङ्ग एकैचोटि
फेरेर भ्याउनु छ कसैलाई !
उखान-टुक्का भनेर
जनवाद ल्याउनु छ कसैलाई !
कसैलाई-
दलाल-पूँजीवाद हटाउन
दलाल- पूँजीवादीसँग चन्दा उठाउनु छ !
कसैलाई चिहानमा गाडेको श्रीपेच
खोतलेर फेरि लाउनु छ ।
कसैलाई पाँचवर्षपछि आउने चुनावको लागि
आजैदेखि प्रचारमा धाउनु छ ।
देश त फुर्सद भए पो बनाउनु !

०००
काठमाडौं ।