नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

बलिया बाङ्गा मान्छेहरू बटुलौँ
ठगीका महारथीहरू परिचालन गरौँ
केहि थान युट्यूबरहरूलाई खुसी पारौँ
नारा लगाऔँ, जुलुस निकालौँ
आऊ हामी पनि
पार्टी खोलौँ !

चन्दा उठाउन पाइने
चन्दा नदिनेलाई ठोक्न पनि पाइने
कालो धनलाई सेतो बनाउने मौका यहि हो
घाँटी सुक्ने गरी कराऔँ
आश्वासनमा जनता झुलाऔँ
जनताको सामु आँसु खसालौँ
खुब कराऔँ
आऊ हामी पनि
पार्टी खोलौँ !

टोल टोलमा गुण्डा राखौँ,
बिरोधीहरुलाई तह लगाउँ
सरकारलाई धम्क्याएर
फैसला आफ्नै पक्षमा पारौँ
आश्वासनका पुल हालौँ
आऊ हामी पनि
पार्टी खोलौँ !

कमिसनवाजहरूसँग मिलेर
चन्दा जम्मा गरौँ
मौकामा चौका हानौँ
पजेरो किनौँ, घर, घडेरी जोडौँ
बाहिर जे जे भने पनि
भित्र आफ्नै दूनो सोझ्याऔँ
आऊ हामी पनि
पार्टी खोलौँ !

लाज सरम मान्नु पर्दैन
देशको लागि सिन्को भाँच्नु पर्दैन
पार्टी खोलेर पनि लुट्ने नै हो
कुनै कानून लाग्दैन
अब सल्लाह गरौँ
जुलुस निकालौँ
आऊ अब हामी पनि
एउटा पार्टी खोलौँ
जीवन सपारौँ !

०००
गाेरखा, हाल- काठमाडाैं