नेपाली हास्यव्यङ्ग्य अनलाइन पत्रिका

घनश्याम रेग्मी :

हिमाली धराको उचो अस्मिता यो
अझै धुत्न पाए मजा क्या हुँदो हो
सबै रत्न जम्मा गरी टाप पारूँ
डुबोस् देश के भो म सत्ता नछाडूँ ।१

थियो पुग्न सत्ता र गोली चलाएँ
मरे सत्र हज्जार यो ठाउँ पाएँ
अझै लाग्छ माटो खनी लास गाडूँ
डुबोस् देश के भो म सत्ता नछाडूँ ।२

विदेशी पुकारेँ र कैयौं म धाएँ
बडो मेजमानी दिए खान पाएँ
त्यही तिर्न भारा परेको छ क्यारूँ
डुबोस् देश के भो म सत्ता नछाडूँ ।३

छ मेरो खुराकी उतैको सधैँ नै
सलामी नपुग्दो भएको अझै नै
सहेली उतै छन् म पोका नतारूँ
डुबोस् देश के भो म सत्ता नछाडूँ ।४

लडूँन् गाउँका भाइ छोरा गरून् जे
मरून् सेरिएरै विपत्ता परून् जे
उता जे हुने हो हवस् कान मोडूँ
डुबोस् देश के भो म सत्ता नछाडूँ ।५

लुटी भूमि आफ्नै पराया रिझाऊँ
नदी बेच्न पाऊँ र अर्बौं कमाऊँ
छ मौका जुरेको अझै धेर गाडूँ
डुबोस् देश के भो म सत्ता नछाडूँ ।६

सुनौलो जुरेको यही भाग भत्ता
बपौती बनेको यही राज सत्ता
बनूँ मात्र आफू म मौका नभाँडूँ
डुबोस् देश के भो म सत्ता नछाडूँ ।७

यता शब्दका जाल फाल्दै रहूँ म
छकाएर हाँडी सबै यो भरूँ म
गरी धेर टुक्रा यही भूमि बाँढू
डुबोस् देश के भो म सत्ता नछाडूँ ।८

०००
भरतपुर, ५ चितवन