नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

तपाईं कस्तो पत्रकार ?
एरपोर्टमा सुटकेश फोरेको देख्नु हुन्छ
देशको मुटु फोरेको देख्नु हुन्न
बिजुली बेचेको कुरा गर्नु हुन्छ
नदी नै बेचेको समाचार छाप्नु हुन्न
नेताहरूको भक्ति गाउनु हुन्छ
देशको धुरी भाँचेको कुरा लेख्नु हुन्न ?

तपाईं कस्तो पत्रकार ?
तारे होटलका गोष्ठी देख्नु हुन्छ
सरकारी अस्पताल देख्नु हुन्न
पिज्जाको गन्ध थाहा पाउनुहुन्छ
नुनको रुने साना नानीहरू चिन्नु हुन्न
नेताका चिल्ला गला लेख्नु हुन्छ
च्यतिएका जाँघे र फरिया लेख्नु हुन्न

तपाईं पनि के पत्रकार ?
नेताका आगन हरेक दिन टेक्नु हुन्छ
जनताको घर देलो देख्नु हुन्न
कागजी योजना छाप्नु हुन्छ
जनताका दुःख र गरिबी छाप्नुहुन्न
ठेकेदार र नेताका श्रीमतीहरूका
रत्यौली छाप्न भ्याउनु हुन्छ
तर निर्मला पन्तहरूको आँसु छाप्नु हुन्न !

विडम्बना
हाम्रो पत्रकार
सत्य देख्दैन
निष्ठा र इमानको कुरा लेख्दैन
शक्ति गान गर्छ !
जता जता हावा चल्यो उतै लर्किन्छ

०००
गोरखा, हाल काठमाडौं