नेपाली हास्यव्यङ्ग्य अनलाइन पत्रिका

तेजविलास अधिकारी :

हामीलाई त
केही अर्थै रहेन
संसद चल्नु वा नचल्नु
यो सरकार रहनु वा ढल्नु
कसले सम्बोधन गर्‍यो संसदमा
के पास भयो विधेयक
केही अर्थै भएन
हो हाम्रो अभाव
घट्दै घटेन ।

चुच्चे नक्सा
जङ्गे पिलर
तातोपानी नाका
खै ! यी त सबै
सरकार फेर्ने वा टिकाउने
आफूलाई बेच्ने वा चिनाउने
मात्रै अस्त्र बनिरहे
बिरामी पर्दा
कुन हस्पिटलमा उपचार गर्ने ?
सुरक्षा कोसँग खोज्ने ?
केही केही पत्तै भएन
हो हाम्रो अभाव उस्तै छ
अझ उल्टै
सहकारीको पैसा हराएको छ
खै ! कसले खाएको छ ?
बेपत्ताहरूको परिवार रोएको छ
खै ! कसले खोजिदिने ?
हुकुमबासीहरूले कब्जा गरेको जमिन
फिर्ता ल्याउन नसक्दा
हैरान छ मेयर बालेन
सुधार्न खोज्नेले पनि
पाएकै छैन जस
खै ! के के भएको छ ?
माइला दाइ !
उस्तै चर्चामा छन्
गौशाला २६
विवादित नागरिकतावालाहरू
पुरानै टिआरसी विधेयक
खै ! के भएको हो ?
हेर न माइला दाइ !
सबैभन्दा बढी मत ल्याउने
धेरै प्रश्न सोध्न सक्ने
मान्छे भान्से बन्दा पनि
न सुरक्षा छ
न शान्ति छ
न प्रश्नको उत्तर छ
खै ! के भएको हो ?
यो प्रश्न भन्ने विषय पनि
सजिलो रहेछ अर्कालाई तेर्स्याउन
आफैंले गर्नुपर्दा समाधान
दिनुपर्दा न्याय
पछि पछि हट्ने रहेछन् सबै ।
आफ्नै मात्र गर्ने भए जोहो
किन हामीलाई भनेको होला
गर्छु यसो र उसो
कम्तिमा हामी
गर्ने थिएनौँ आशा
मान्ने थिएनौँ भरोसा
दुःखमा त हामी थियौँ नै
अन्याय त भोगेकै हो युगौँदेखि
न्यायालय चिनेकै थियौँ
आफ्नै बाटोमा हिनेकै थियौँ
बेकारमा पत्याउने भएर
सपना बेच्नेको कुरा
झन् कस्तो पीडा भयो माइला दाइ !
निर्मलालाई न्याय पनि छैन
मदनको हत्या हो कि मृत्यु ?
बोल्दैन कोही
गुमेको जमिन पाउने कहिले ?
चोरलाई चौतारो
अनि
साधुलाई सुली
सुकुमबासीलाई गोली
हुकुमबासीलाई जमिन
के हामीले यही विषय
यस्तै नेता
खोजेको हो र ! माइला दाइ
अब जाने कता ?
भन्ने कसलाई हो ?
सरकारका सिन्दुर पहिरिनेहरू
संसदमा जानेहरू
वडादेखि प्रदेशसम्म
हाम्रै करबाट कमाउने
मतबाट मात्नेहरू
खै ! कता छन् माइला दाइ ?
अब कसो पो गर्नु ?
माइला दाइ !

०००