नेपाली हास्यव्यङ्ग्य अनलाइन पत्रिका

रामप्रसाद पन्थी :

तातो घाम तातो हावा तातै भयो पानी
पसिनाले नुहाउने परिसक्यो बानी ।

खोलानाला सुकिसके मूल ठन्डाराम
हाहाकार जताततै छैन जाने ठाम ।

रित्ता गाग्री ग्यालेनका ताँती लगाएर
पानी कुरी बस्नु पर्छ माखा धपाएर ।

आफ्नो ज्यान आफैलाई थाल्यो गनाउन
जुम्राले नि थालिसके डेरा जमाउन ।

पानीबिना कसो गरी रोप्ने होला धान
कृषि विज्ञ भन्नेहरू तिमी आफै जान ।

गमलामा धान रोप्ने ठूलाबडा जन
कति मुरी फलाउछौ धान तिमी भन ।

सुनेको छु सहरमा ठूलाबडा नेता
बियरले कुल्ला गरि डुल्छन् यताउता ।

गफ मात्रै ठूला गर्छन् काम फुटी कौडी
कालो धन थुपारेर खेल्छन् खुबै पौडी ।

मनसुन भित्रिदैछ भन्ने हल्ला थियो
देखिएन यता कतै कतातिर गयो ।

भ्यागुताको पूजा पनि नगरेको हैन
गर्मी मात्रै बढेको छ पानी पर्‍या छैन ।

काकाकुल भए वरै ! जीवजन्तू सारा
डामाडोल भयो प्रभु लौ न पानी पार ।

०००
रेसुङ्गा न पा २, गुल्मी