नेपाली हास्यव्यङ्ग्य अनलाइन पत्रिका

रमेश खकुरेल :

जहाँ व्यर्थ हुन्छन् सबै अन्य नीति
जहाँ ज्ञानको शास्त्रको छैन प्रीति
जहाँ खट्न सक्तैन जोतेर खेती
त्यहाँ खूब राम्रो छ यो राजनीति ॥

न विज्ञानको ज्ञान पर्नेछ जान्नु
न ता सत्यको ध्यान नै पर्छ गर्नु
दया वा कि मायाँ कुनै चाहिँदैन
न ता साफ इन्साफको छोइँदैन ॥

लफङ्गा जुटायो अडङ्गा लगायो
छ है सामु जङ्घार भन्दै करायो
नयाँ रङ्गका आश चङ्गा उडायो
यही नाममा भीड साथै कुदायो ॥

यहाँ हैन सेवा लिने काम मेवा
जहाँ छैन ढेवा त्यहाँ हुन्न टेवा
सधैँ ध्यान कैले पुगी मर्छ मैह्ना
खखस् खस् गरी नोटले दिन्छ चैन ॥

कुनै छैन मन्त्री न सन्त्री न जन्त्री
यहाँ जो नहोस् नोटका लागि तन्त्री
सबै पाल्नु हो के गरी यी प्रजाले
यिनैले मिली तन्त्र यो मार्न थाले ॥

थियो शुद्ध सेवा टुसो भाँचिएछ
“स”को भो “म”मेवा भनी ठानिएछ
यही भ्रान्तिले देशलाई डुबायो
करोडौं जना घुँक्क गर्दै रुवायो ॥

०००
काठमाडौं