नेपाली हास्यव्यङ्ग्य अनलाइन पत्रिका

हेमराज पन्त :

जीरा, नून र तेल अन्य मसला छोपेर फिर्ता गर ।
सुक्का मोह गरेर कालकुटले भण्डार आफ्नो भर ॥
तिम्रो चेत बिषाक्त भो वचनले भान्सा बिराली पसी ।
काली यी वनकी चरी सुनचरी बस्थी कमेरो घसी ॥ १

ताजा आँसु छ नेत्रमा हरघडी उम्ली रहेको छ यो ।
सोचे के अब भोग्छु के बुझ तिमी केके गयो के गयो ॥
गर्छौ काम कुरा अनेक थरिका विश्वास सारा कसी ।
काली यी वनकी चरी सुनचरी बस्थी कमेरो घसी ॥ २

भोको पेट अनाज भेट नहुँदा पस्थ्यौ तिमी कन्दनी ।
हुक्के जागिरको छ सोम रस जो फन्केर नाँच्यौ तिमी ॥
नाङ्गो आङ हुँदा र द्रव्य नहुँदा ती आँसु बग्थे खसी ।
काली यी वनकी चरी सुनचरी बस्थी कमेरो घसी ॥ ३

आशा गर्दछ जो अभाव चुलिँदा वा अन्न हुन्थ्यो कमी ।
बग्थे कल्कल सिन्धुमा म खहरे वात्सल्य माया जमी ॥
स्वार्थी देख्छु समाज,देश,दुनियाँ विश्वास छिन्ने रसी ।
काली यी वनकी चरी सुनचरी बस्थी कमेरो घसी ॥ ४

कस्तो हाल थियो बुझी विगतको माया अँगाले भरी ।
भेडाको छ बथान बस्छ निमुखो पासो परेकी चरी ॥
देखे नागिनको कला,चतुरता संस्कार चोखो डसी ।
काली यी वनकी चरी सुनचरी बस्थी कमेरो घसी ॥ ५

छाँयातुल्य रहेछ जीवन बुझे बुझ्दा झसङ्गै परे ।
सोचे त्यो परिवार धार खुकुरी अर्को तलामा सरे ॥
अर्ती दिन्छ सदैव मानव उहीँ कालो गुफामा बसी ।
काली यी वनकी चरी सुनचरी बस्थी कमेरो घसी ॥ ६

पालौ दूध, दही दिई सब जना यी नाग वा नागिनी ।
ओथारो किन बस्छ हीन मतिले त्यो प्रेत वा डाकिनी ॥
खोजी ज्ञान पसे सबै घर डुली पोतेर कालो मसी ।
काली यी वनकी चरी सुनचरी बस्थी कमेरो घसी ॥ ७

०००
पाटन २ सिलङ्गा, बैतडी
हालः-पहलमानपुर, कैलाली