नेपाली हास्यव्यङ्ग्य अनलाइन पत्रिका

हिरा भट्ट :

एमाले हुँ भनी विशाल बमझैँ पड्क्यो यता एउटा
काङ्ग्रेसी म भनेर गड्गड गरी गड्केछ अर्को उता
माओवाद र रास्वपा मुखसँगै छन् राप्रपा घन्घनी
पार्टी होइन देश बोक्छु मुटुमा भन्दैन कोही पनि
|१|

जिब्रा दाँत विकासका बिगुलका बिक्छन् सुरा मासुमा
पौडी खेल्न धकेलिए गरिबका आँखा सधैँ आँसुमा
बाँझो बस्छ विकासखेत जहिल्यै खन्दैन कोही पनि
पार्टी होइन देश बोक्छु मुटुमा भन्दैन कोही पनि
|२|

आआफ्नो दलको भए रसभरी जेरी बने गोबर
अर्काको दलको भए रसभरी जेरी बने गोबर
बोलीमा सतिसालतुल्य बलियो बन्दैन कोही पनि
पार्टी होइन देश बोक्छु मुटुमा भन्दैन कोही पनि
|३|

साथी लाउनुहुन्न तुच्छ पिरती काली निराशासित
सालीतुल्य सधैँ सधैँ बढिरहोस् सत्प्रेम आशासित
हाँसून् नित्य निराश अक्षरहरू हाँसोस् मसी लेखनी
पार्टी होइन देश बोक्छु मुटुमा भन्दैन कोही पनि
|४|

सादा अक्षर घोल्छु छन्द-रङमा जो शारदाले दिए
नाङ्गाले पनि लाउलान् कि तनमा जो वस्त्र मैले सिएँ
पाना राष्ट्र-किताबभित्र कति छन् गन्दैन कोही पनि
पार्टी होइन देश बोक्छु मुटुमा भन्दैन कोही पनि
|५|

०००
कैलाली