नेपाली हास्यव्यङ्ग्य अनलाइन पत्रिका

लक्ष्मण नेवटिया :

डायरीको बुट्टेदार
भाँडोमा सँगालिएको
हो,म लिएर आएको छु
कविताको मीठो अचार।

थोरै आँसुको नुनसँगै,,
अलिकति मायाको चिनी अनि
कलमको चम्चाले
व्यङ्ग्यले झानेर पनि।
आक्रोशको आगो बालेर,
कागतको कराइमा पकाएको छु।

आशा, आकांक्षा सुनौला
सपनाको मसला खन्याएँ।
जीवनका विभिन्न अनुभवलाई
अचारमै मिसाएँ
बढी गर्दिन
थप यसका गुणको विस्तार।

मुटुको ओखलमा कुटेर भाव,
आफ्ना तीतामीठा विचार।
रचनात्मकताको सृजनालाई
कानको स्वाद अनुसार
आफ्नो स्वभावलाई दिएर
सकारात्मक आकार
गर्नुस् यो काव्यजगतको
अनुभूतिको प्रस्तुति स्वीकार।

चाख्नुस् स्वाद लिँदै
केही पर्दैन तिर्न
अहिले त मात्र गर्दैछु
अचारको प्रचार।

डायरीको बुट्टेदार
भाँडोमा सँगालिएको
“म लिएर आएको छु
कविताको मीठो अचार”।

०००
विराटनगर