नेपाली हास्यव्यङ्ग्य अनलाइन पत्रिका

लक्ष्मण नेवटिया :

हो ! म खाँटी क्वाँटी कार्यकर्ता हुँ हजुर
जता पायो दाम उतैको प्रवक्ता हुँ हजुर।

मेरो एउटै चाहना, फलोस्
मेरो परिवार मेरो घर,
जाने हो भने जाओस् सदस्यता
मलाई कसैको छैन डर।

भरिया हूँ बोक्छु, जता बढी पाउँछु
मलाई कस्को भर।
जता पायो टाउको छिरायो
पैसा झार्‍यो हुन्छु उसैको अनुचर।

कहिले “यसपा”मा कहिले “उसपा”मा
भर्न पाउँछु झोला जान्छु दगुरेर उस्तामा।

मेरो काम झुर मेरा कुरा पनि झुर हजुर
“हो ! म खाँटी क्वाँटी कार्यकर्ता हुँ हजुर”
जता पायो दाम उतैको प्रवक्ता हुँ हजूर।

भाषणमा मेरो क्रान्ति –
राती भट्टीमा शान्ति
पेवा होइन म कुनै वादको
नराख्नु होला भ्रान्ति।

लडाउने एक आपसमा सबैलाई
आफू डुब्ने अरूलाई पनि डुबाउने
जसले मजाले पुर्‍यायो पैसा खातामा
गीत उसैको मुटु फुकाएर गाउने।

जताकाले गर्‍यो कानमा टनटनाटनको कुर्
उतै मोडिन पुग्छन् मेरा खुर हजुर
“हो ! म खाँटी क्वाँटी कार्यकर्ता हूँ हजूर”
जता पायो दाम उतैको प्रवक्ता हुँ हजूर।

०००
विराटनगर