नेपाली हास्यव्यङ्ग्य अनलाइन पत्रिका

काशीनाथ मिश्रित :

उदेक लाग्यो अनि खिन्नता भो
पैले र ऐले कति भिन्नता भो ?
हटेर गाई अब बाघ आयो
यो राष्ट्रमा राष्ट्रियता हरायो !

रहेन खै इज्जत के कमायो ?
उल्टै उसैले अहिले गुमायो
अभेद्य इन्द्रासन डग्मगायो
यो राष्ट्रमा राष्ट्रियता हरायो !

खुम्चे सिमा साँगुरियो कि देश !
छिमेकका बाँध बने विशेष
फर्केर आफ्नै जलले डुबायो
यो राष्ट्रमा राष्ट्रियता हरायो !

खै के भयो सन्धि नदीहरूको ?
कोसी र काली अनि गण्डकीको
निर्दोष नीलो जलले सराप्यो
यो राष्ट्रमा राष्ट्रियता हरायो !

स्वदेशको गौरव वीरता हो
भागेछ क्यारे अहिले कता गो ?
कठै बिरामी इतिहास रोयो
यो राष्ट्रमा राष्ट्रियता हरायो !

शान्ती, अहिंसा र परोपकार
सिद्धार्थको चिन्तन सिद्धियो र ?
रक्सी पिएझैँ जग लर्खरायो
यो राष्ट्रमा राष्ट्रियता हरायो !

नेपालिका लास वनैभरी छन्
गुलाव श्रीखण्ड बसाउँदैनन्
बेलायती अत्तर मग्मगायो
यो राष्ट्रमा राष्ट्रियता हरायो !

सुनिन्न खै वेद कतै पढेको
जताततै सुन्छु मरे–लडेको
अमेरिकी बारुद पो गनायो
यो राष्ट्रमा राष्ट्रियता हरायो !

कमेज, दौरा, सुरुवाल, टोपी
चोलो, मजेत्रो, फरिया र टेकी
हटाइ टाई किन फर्फरायो ?
यो राष्ट्रमा राष्ट्रियता हरायो !

सुनिन्न काहीँ मुरली बजेको
गाइन्न रोदी, सँगिनी र सेलो
पाश्चात्य छाडा पपले गिरायो
यो राष्ट्रमा राष्ट्रियता हरायो !

नेपाल छोडेर युवा कतार–
मलेसिया जान गरे हतार
विदेशमा नै पसिना बगायो
यो राष्ट्रमा राष्ट्रियता हरायो !

जन्मे अरे गौतम इन्डियामा
सुन्दा कुरा दुःखित छन् नि आमा
हेपेर बोल्ने कसले गरायो ?
यो राष्ट्रमा राष्ट्रियता हरायो !/

स्वतन्त्रता भाषणमा बिलायो
कानूनले हात कता मिलायो
यहाँ प्रजातन्त्र निकै करायो
यो राष्ट्रमा राष्ट्रियता हरायो !

जन्ताहरूको मुख भो अँधेरो
दर्बारिया मात्र चढुन् पजेरो
राष्ट्रियता यीसँग नै डरायो
यो राष्ट्रमा राष्ट्रियता हरायो !

०००
मिश्रित तरङ्ग (२०८१)