नेपाली हास्यव्यङ्ग्य अनलाइन पत्रिका

डा. लाेकेन्द्रप्रसाद पाैड्याल :

बरु दर नै तोक्देउ हाकिम
घुस चाहिने कति ?
समयको बर्वादी भो
काम सल्टाउन अति

निर्णयको आधार के हो ?
भेउ बुझ्नै गाह्रो
खासखुसमा भोलि भन्दै
तताइदिन्छौ पारो

मोलमोलाई पर्खिपर्खी
कति अड्डा धाउनु ?
काम फत्ते गर्ने वाचा
कसरी हो पाउनु ?

भाका मन्त्रि सवै चोखा
पार्टी कोटा नाममा
बचाई दिने भएपछि
के डराउँथे काममा ?

डामे पनि भ्रष्टाचारले
तिनकै भाउ ठूलो
नैतिकताको चर्को भाषण
आशिर्वादको दुलो

समाउनेलाई पनि कठिन
भनिहाल्न चोर
आखिर भोलि यौटै फोनले
नछोडिने हो र ?

जता पनि भ्रष्टाचार
खै त सुधार प्रष्ट ?
ऋण काडेको राष्ट्रको धन
भएन र नष्ट ?

हरेक दिनको भाषणवाजी
कुरा नानाभाँती
ढाकछोपले कान टट्याउने
स्याल हुईंयाका ताँती ॥

०००
काठमाडाैं