नम्रता गुरागाइँहरियो चुराका गहिरो खोजाइ
हो राजकुमारहरुको बजारमा धेरै आकारप्रकारहरु पाइन्छन् उध्रिएका, च्यातिएकाहरुको भीडमा स्वस्थ त्यसैत्यसै हराएको हुनसक्छ म सग्लोसग्लो र अग्लो खोजिरहेछु ।
नम्रता गुरागाइँ:
हेलो !
मेरो सपनाको राजकुमार
किन मलाई सपनामा मात्र जिस्क्याउँछौ
म हरियो चुरामा सजिएकी छु
तिमी चाहन्छौ भने म
हरियै पहिरनमा बसिदिउँला
तिम्रो खुसीको लागि
हरियै क्रिमपाउडर धसिदिउँला ।
उराठ लाग्दो महिना समाल्दासमाल्दा
बल्लबल्ल साउन आएको छ
हातका चुरामा साउन बोकेर
मेरो धराने मन
कहिले भानुचोक त कहिले छाताचोक पुग्छ
कहिले बाँझगरा त कहिले भेडेटार पुग्छ
मिल्ने जोडी भेट्न साँच्चै गाह्रो रहेछ
मनको रहर फुकाउन साँच्चै साह्रो रहेछ
कोही छैनौं त मेरो आवाज सुन्ने ?
ठीकै छ
खुट्टा थाकेर के भयो र
तिमीलाई भेट्न
मन अझ उत्साही छ ।
हो राजकुमारहरुको बजारमा
धेरै आकारप्रकारहरु पाइन्छन्
उध्रिएका, च्यातिएकाहरुको भीडमा
स्वस्थ त्यसैत्यसै हराएको हुनसक्छ
म सग्लोसग्लो र अग्लो खोजिरहेछु
मलाई
स्वस्थ्य, निर्भिक र जेहेन्दार चाहिन्छ
मेरो जिन्दगी समर्पित गर्ने
एउटा मिठो संसार चाहिन्छ ।
कसैले सुन्यो कि ?
०००
अमेरिका
Subscribe
Login
0 Comments
Oldest
