नेपाली हास्यव्यङ्ग्य अनलाइन पत्रिका

हरि कोर्काली :

हजुरले त
भ्रष्टाचारप्रति सुन्ने सहनशीलता नै भन्नुभएको रहेछ
ढुंडी परेका कानले धोका दिँदा
हामीले शून्य सहनशीलता भनेको सुन्यौं र
भ्रष्टाचारले अब कुलेलम ठोक्ने भयो भन्ने विश्वासलाई
बेसरी तालीले चुन्यौ ।

एक अर्को प्रसङ्गमा
भ्रष्टाचारको गन्ध कतैबाट नआओस् भनेर
चेतावनी दिनुभयो
विश्वासलाई झन् दृढ तुल्यायौं
तपाईंकै अगाडि गडगड ताली पिटेर
मनमा हर्षको सगरमाथा चुल्यायौं ।

दुवै भनाइले गडगड सराहना पाएको देखेर
तपाईंको अनुहारमा बेग्लै
कस्तो विचित्रको चमक उदाएको थियो
त्यो पनि राम्ररी नियाल्यौं ।

आज कुनै पनि काम लिएर
जहाँ-जहाँ गए पनि
अतिरिक्त थैली नथमाई नहुने भएछ
सबै निर्धक्क
कारवाही कसैलाई नहुने रहेछ
बल्ल पो थाहा भयो
त्यो बेला तपाईंको आत्मामा बसेर के बोलेको रहेछ !

र त्यो बोलीले
सबैतिरबाट
भ्रष्टाचारको कस्तो सुगन्ध आउनुपर्छ भन्ने कुरा
कति घुमाएर
बुझ्नुपर्नेले प्रस्ट बुझ्ने गरी
कति मिलाएर भन्नुभएको रहेछ ।

बल्ल पो थाहा भयो
तपाईंको मुहारमा
त्यस्तो चमक किन उदाएको रहेछ !

०००