नेपाली हास्यव्यङ्ग्य अनलाइन पत्रिका

धेरै गाह्रो हुँदोरहेछ
र पनि
झुटो बोल्न सिकिरहेको छु ।
साह्रै अप्ठ्यारो हुँदोरहेछ
तैपनि
चिप्लो घस्न ट्यूसन पढिरहेको छु ।
निकै खतरनाक हुँदोरहेछ
जे भए पनि
फटाहाहरूलाई साथी बनाउने
प्रयास गरिरहेको छु ।
अत्यन्त कठिन हुँदोरहेछ
भए पनि
नक्कली हाँसो हाँस्ने
प्रयास गरिरहेको छु ।
ज्यादै सकस पर्दोरहेछ
परे पनि
कृत्रिम आँसु झार्न
बल गरिरहेको छु ।
पोख्त हुनै नसकिने रहेछ
नसके पनि
जालझेल र प्रचारबाजीतिर पनि
चासो दिइरहेको छु ।
खै,
अनुभव सकेसम्म बटुलेकै हो
यसै गरी हो कि कसरी हो !
सफल भइने हो कि नभइने हो !
जिन्दगीको कठोर अभ्यास गरिरहेको छु ।

दियाले