नेपाली हास्यव्यङ्ग्य अनलाइन पत्रिका

हिजो जस्तो
सिगाने केटाकेटी नठान
के गर्छ भुराले नभन
अब त
म पनि तन्नेरी भाको छु
त्येसैले भट्टीतिर आको छु ।

हेर कसरी
कानमा, मुन्द्रा, घाँटीमा लकेट
हातमा बाला नाकमा फुली लाको छु
माथि छत्री झैं छत्रिदै गाको छु
तल सियो झै सुक्दै आको छु
दालभात भन्दा धेरै
भाङ धतुरो रक्सी खाको छ
कस्ले रोकटोक गर्ने अब ?
किनभने
अब त
म पनि तन्नेरी भाको छु ।

अब त हामीसँग
गब्बर पनि डराउँछन्
हामीले भनेपछि अच्छेअच्छेले पनि
सुरुवालको के कुरा
कट्टु पनि छेराउँछन्
अरु नभए पनि
टोले गुन्डाको पद पाको छु
किनभने
अब त
म पनि तन्नेरी भाको छु ।

बा विदेश गाका छन्
आमा पनि दिन भर
खै कता हराउँछिन्
सुन्दैछु आजभोलि
बालाई भन्दा धेरै
अरुलाई मन पराउँछिन्
म पनि भरी भाको छु
भने जति पकेट खर्च पाको छु
पढाइ सढाइ छोडिकन
फिल्म हेर्न
तरुनी ल्याई आको छु
किनभने
अब त
म पनि तन्नेरी भाको छु ।

हजुर बाआमा गाउँ छोडी
म त मम्मीसित
पढ्न भनी सहरतिर आको छु
पढाई लेखाइ भन्दा
डिस्कोतिर धेरै धाको छु
आज एउटीसित
भोलि अर्कैसँग मायाप्रीति लाको छु
किनभने
अब त
म पनि तन्नेरी भाको छु ।

दाङ, हाल काठमाडौं