नेपाली हास्यव्यङ्ग्य अनलाइन पत्रिका

बत्तिस प्रान्तबाट चौसठ्ठी
र
चौसठ्ठीबाट एक सय अठ्ठाईस
प्रान्तमा देखिएको चेसको बोर्डमा
एक राजाले
अर्को राजालाई हराउने खेल शुरू हुन्छ,
जब एक राजा चेकमा पर्छन्
चेसको छाती चौडा हुन जान्छ
चेसका गोटीमा अकस्मात बृद्धि हुन्छ
मानौं,
बाँझो खेतमा
गाईको गोबरले
हर्लक्क बढेको झार झैं,

खेलको अब नियम
नियम सङ्गत छैन
गुरिल्ला युद्ध झैं चल्दैछ,

नियम सङ्गत खेल्दा
राजा र मन्त्री दुबैतर्फ
एक–एक वटा थिए
अब चेस बोर्डको रूप फेरिएको छ,
एकातर्फ नै तीन राजा, तीन मन्त्री छन्
हात्ती, घोडा, उँट र सिपाहीहरू दोब्बर नै बढेका छन्
चाल दुईतिरबाट हैन, चारैतिरबाट छ,
कसलाई कसले ढाल्ने हो
चेसभित्रकै सेना, उँट, हात्ती र घोडालाई थाहा छैन
यी सबै आदेशको पर्खाइमा छन्
तर
आदेश ?
कसको मान्ने भन्नेमै
अन्यौल छ यिनीहरूलाई,

एउटा नयाँ चेस बोर्डभित्रको चाल
यसरी नै अनिश्चित चलिरहन्छ
चेस बोर्डको भूइँ प्वाल नपरूञ्जेलसम्म ।
सामाखुशी, काठमाडौँ ।