सोझो गाउँलेभत्ता पचाए हुन्छ
लोकतन्त्र आयो भन्दै नाच्दै गीत गाए हुन्छ
ग्यालरीमा गफ मार्दै सांसद भत्ता पचाए हुन्छ ।
आफ्नो दुनो सोझ्याउनू जनताको म्याण्डेट भन्दै
जस्को मनमा जे लाग्या’छ त्यही नारा लाए हुन्छ ।
खोसिने पो हो कि कुर्सी निकास दिने निर्णय लिँदा
हारिन्छ कि भन्ने डरले चुनाव सार्दै आए हुन्छ ।
तलब खाँदै टाइम पास गर्ने मौका सधैँ कहाँ मिल्छ
विदेशीको आशिष लिन शक्तिकेन्द्र धाए हुन्छ ।
आफूचाहिँ पन्छिएर अरूलाई नै दोष थुपार्नु
माथिबाट खस्छ अब उँभो मुख बाए हुन्छ ।
मात्तिएर बहुलाउँदा लाज शरम किन मान्छौ
बिहे गर्नुभन्दा अघि घोर्ले छोरो पाए हुन्छ ।
अग्रगामी होऊँ आफ्नै पनि विरोध गर्दै
अचूक शान्ति खलबल्याउन गाउँशहर छाए हुन्छ ।
स्वास्नी पोइल गए पनि टायर बाली तोडफोड गर्नु
जे गरे नि लोकतन्त्रमा दुइचार लाठी खाए हुन्छ
ग्यालरीमा गफ मार्दै सांसद भत्ता पचाए हुन्छ ।
थलारा, बझाङ
Subscribe
Login
0 Comments
Oldest
