नेपाली हास्यव्यङ्ग्य अनलाइन पत्रिका

सत्य

माक्र्सवादीहरूको पनि ठूलो दरवार हुँदो रै’छ
दरवारमा हरिया रंगका ढोके, हुक्के, सुसारे लहरै भेटेँ
जनताको मान्छे भनेर ठूलो डङ्का पिटेर हिँड्थ्यौ कमरेड
तिनै जनताका डरले लुक्दै हिँडेको पनि यिनै आँखाले देखेँ ।

दोहोरो मापदण्ड
देश झनझन भुवँरीमा फस्दै गएका बेला
टिभीमा अनुहार देखिने लोभले मन्त्रीज्यू विमोचनमा निस्कनुहुन्छ
तारे होटलमा भारत र अमेरिकाको ककटेल डिनर डकारे पनि
भाषणमा भने अमेरिका र भारतलाई गाली गरेर निस्कनुहुन्छ ।

नयाँ राजा

यौटा राजाबाट खोसेको सत्तामा
अर्को राजाले कर्के आँखा लाउँदैछ
जनताको मन जित्नुपर्छ भन्थे लोकतन्त्रमा
ऊ भने मौका हेरेर सुटुक्क शक्तिकेन्द्र धाउँदैछ ।

विज्ञापन

संविधानसभा र राजसभामा
के फरक छ मामु ?
सुरक्षाको स्थिति यस्तै रहे
दुवै उस्तैउस्तै हो नानु ।