नेपाली हास्यव्यङ्ग्य अनलाइन पत्रिका

आजभोलि हाम्रो शहरमा
घरघर हुने खानेका
घरका मालिकलाई सघाउन
हुन्छन् कान्छा पालेका

एउटा हुन्छ सानो कान्छो
अर्को हुन्छ ठुलो कान्छो
“त्यो काम गर्” भने गर्ने कान्छो
“गरिस्योस्” भने ठुलो कान्छो

कान्छा उठ तँ यो सफा गर
छिटो जा त्यो त्यो गर
खुरुक्क भनेको मानी तैँले
अनि यो गर त्यो गर

हजुर उठिस्योस् सफा गरिस्योस्
छिटो अनि त्यो गरिस्योस्
खुरुक्क भनेको मानिस्योस् त
त्यसपछि त्यो गरिस्योस्

आदेशमा स्योस थपिए
जुरुक्क उठ्छ ठुलो कान्छो
बिना स्योसको आदेश टेर्ने
तयार सधैं छ सानो कान्छो

आदेश दिँदा दिने झुक्किए
आदेशमा स्योस थपे बिर्सिए
एउटाको काम अर्कोमा सर्छ
कहिले काहीँ बित्यास पर्छ !

कसैको सानो कान्छो हुँदैन
सप्पै कामलाई ठुलो कान्छो
कतै ठुलोकान्छै गयल छ
सप्पै कामलाई सानो कान्छो !

बत्तिसपुतली, काठमाडौं