नेपाली हास्यव्यङ्ग्य अनलाइन पत्रिका

राजकुमार !
आफ्नो पच्चीसौँ जन्मदिन मनाउन
यो वृद्धाश्रममा आएका छौ तिमी !
…..
तिमीलाई धन्यवाद छ !
हामीलाई सम्झेर यहाँसम्म आयौ
धेरै धेरै धन्यवाद छ तिमीलाई !
…..
देख्यौ होला नि—
यहाँ त हामी
कालले पनि बिर्सिसकेका
पुराना मान्छेहरू मात्र बसेका छौँ !
देवताहरूको आरती गाउँदै
केही बृद्ध बुख्याँचाहरू बसेका छौँ !
मसानजस्तो मन्दिरभित्र
भूतप्रेतहरू बसेका छौँ !!
…..
बिहानै सुनको झोलाभरि
के बोकेर आयौ तिमी ?
तिमीले ल्याएको यो कोसेली
ऊ ती बाआमाहरूलाई बाँडिदेऊ,
जसले तिमी जस्तै राजकुमारहरू
जन्माएका थिए यो धरतीमा !
…..
उनीहरूलाई नै बाँडिदेऊ
तिम्रो मायाको यो कोसेली !
मलाई तिमीले आज
केही पनि दिनु पर्दैन !
फलफूल, मिठाई वा दही
लुगा, चप्पल वा दोसल्ला
केही पनि दिनु पर्दैन !
…..
बाबु !
आज तिम्रो जस्तै
मेरो पनि असीऔँ जन्मदिन हो !
मसँग असी वर्षसम्म
कसैलाई सुनाउन नपाएको
एउटा लामो कथा छ !
म मेरो समयलाई
सुनाउन चाहन्थेँ यो कथा !
तर सुन्दै नसुनी मलाई बगर बनाएर
अँधेरी खोलाझैँ भागिरह्यो मेरो समय !
…..
म आज तिमीलाई
त्यही पुरानो कथा
आफ्नो जन्मदिनको उपहार दिन चाहन्छु !
म मेरो जीवनभरिको सपना
दिन चाहन्छु तिमीलाई !
म तिमीलाई सुनाउन चाहन्छु
मेरो कथा !
के तिमी सुन्छौ ?

उफ् !
आँखा खोलेर हेर्दा
तिमी पनि कतै भागिसकेछौ !!
काठमाडौं