नेपाली हास्यव्यङ्ग्य अनलाइन पत्रिका

१.समाचारको रोटी

घटनाको तावामा पकाएको
खुवाउनु हुन्छ तातो तातो
समाचारको रोटी,
प्यान्टलाई पाइजामा
पाइजामालाई धोती,
आफूलाई जाँच्ने आफै
बनाएका छन् कसौटी
चित पनि उनकै
पट पनि उनकै गोटी,
हजुर, यो आधुनिक युगको सञ्जय
अर्थात मिडिया हो,
उनको रोटीका लागि कृपया
सुनिदिनुस् न चुप लागेर
एउटै समाचार दस चोटि ।

२. मोबाइलमा संस्कार

छोराछोरीको संस्कारसँग
आमाबाबुलाई छैन सरोकार
मोबाइल किनिदिएर
देखाउनु हुन्छ झुठो प्यार
उनका लागि त अचेल
भएको छ सजिलो
मोबाइल बिग्रेमा
छोराछोरीलाई केरकार
र छोराछोरी बिग्रेमा
मोबाइल छ जिम्मेवार ।

विराटनगर