नेपाली हास्यव्यङ्ग्य अनलाइन पत्रिका

शुभ्र हिमालहरू
नीला पहाडहरू
आँखा तानेर दूर क्षितिजसम्म
पर्खिरहेछन् तिम्रै आशामा ।
त्यसैले
मेरा प्यारा डमरुहरू
जाओ अव जाओ
हिमालको सिंयालमा खेल
पहाडको मझेरीमा नाच ।
उडिसके त्यहाँका
वीरताका इतिहासहरू
सेलाइसके त्यहाँका
रक्षा सिपहरू
त्यसैले
मेरा प्यारा डमरुहरू
जाओ आजै जाओ
हिमालको मुस्कानसँग हाँस
पहाडको अस्मितामा पस ।

मत फुटेको छ मधेशको
तन टुटेको छ तराइको
च्यातिएका छन् ध्यार्रै
मान्छेहरू त्यहाँ
र त
पाउनेछौ चुस्न निर्धक्क
जोतेर बेरोकतोक
तिम्रा दाराहरू
तिनका मुटुसम्मै ।
त्यसैले
मेरा प्यारा डमरुहरू
जाओ ऐल्यै जाओ
पहाडको घाँटीमा पुग
हिमालको छातीमा सुत

देखाउँदै कृतघ्नता
निर्लज्ज गोठालाहरू
उभिनेछन् त्यहाँ
तिम्रै पक्षमा
धोखा दिँदै आफ्नै
भेडा अनि बाख्रालाई
त्यसैले
मेरा प्यारा डमरुहरू
जाओ फेरी जाओ
तराइका उष्णतामा रमाओ
पहाडका कालापानीमा रमाओ ।

स्थगित निर्माणक्रमहरू
खण्डहर भेडीगोठहरू
खियाखियामय ती
बैचारिक पक्ष्यहरू
घिऊ थप्दैछन्
हाम्रा योजनाहरूमा
त्यसैले
मेरा प्यारा डमरुहरू
जाओ झट्टै जाओ
मनले हिकेर जाओ
शिकारै शिकार छ त्यहाँ
संबेदनशील भूमिहरूमा
अस्मिताका भित्री आँतहरूमा

बल्छी खेल्दैै मेची पुग्नु
जाल हान्दै काली पुग्नु
र्याल काढ्दै मुस्ताङ्ग चढ्नु
ओठ चाट्दै सुस्ता झर्नु
भोक लागे मान्छे खानु
तिर्खा जागे हिउँ चाट्नु
हाम्रा साथी त्यतै हुन्छन्
उनले सघाउलान्
चोटो अनि बुँइगलमा
उनले घुमाउलान्
त्यसैले
मेरा प्यारा डमरुहरू
जाओ उफ्रिदै जाओ
चारकोशे झाडीमा जाओ
धान फल्ने माडीमा जाओ ।

चाहना हो यो
तिम्री आमाको
युगौँ पुरानो
हिमनदीहरू सुँघ्ने
वनौषधिहरू चुम्ने ।
हिमाल र पहाडभरि
तिमी तिमी कुद्रनुपर्छ
पञ्चशीलको सिद्घान्तलाई
तिमीले नै खानुपर्छ ।
संसारलाई बेग्लै मोडमा
डमरुले मोड्नुपर्छ ।
त्यसैले
मेरा प्यारा डमरुहरू
जाओ उतै जाओ
बाघ राज्यकालागि
एउटा आधारशिविर
विशाल डमरु राज्य बनाओ
विशाल डमरु राज्य बनाओ ।

काठमाडौं