नेपाली हास्यव्यङ्ग्य अनलाइन पत्रिका

माघ १९, २०७२ । अधिंकाश कलाकारले आफ्नो मुख्य कमाइँ स्रोत प्रवासमा हुने प्रस्तुतिहरूलाई बनाउँदै आइरहेको बेला सिस्नुपानी नेपाल आबद्ध कलाकर्मीले भने दुबई र कतारमा भिन्न कार्यक्रम गरेका छन् । भिन्न यसअर्थमा कि, कलाकार तथा स्रष्टाहरू विना पारिश्रमिक प्रस्तुत भएका थिए भने दर्शक स्रोताहरूले निःशुल्क प्रवेश पाएका थिए । खाडी मुलुकका श्रमशील नेपालीहरू माझ सकारात्मक उत्प्रेरणा प्रबर्द्धन गर्ने ध्येयले ‘दुई थोपा हाँसो’ कार्यक्रम लिएर पुगेको टोली दुई मुलुकमा ९ वटा प्रस्तुति सम्पन्न गरेर सोमबार काठमाडौं फिरेको छ ।

अघिल्लो साता दुुबईमा युएईका लागि नेपाली राजदूूत धनन्जय झाले उदघाटन गरेको हास्ययोग र कर्मयोग सहितको यो कार्यक्रममा हजारौं श्रमशील नेपाली सहभागी भएको आयोजकको दावी छ । टोलीले सभा हलसंगसंगै नेपालीहरू काम गर्ने थलोमै पुगेर प्रस्तुति दिएको हो । युएईको अल्फाजरस्थित जाफर मेन्टिनेन्स कम्पनीको कामदार बस्ने अल्फुज क्याम्प, रस अल खेमाहस्थित सेरामिक्स स्टेडियम (फुटबल मैदान), आबुधाबीस्थित इन्डियन सोसियल सेन्टरमा प्रस्तुति दिएपछि कतार पुगेको टोलीले अलखोरस्थित अल्जाइबर क्याम्प, सनैया–१५ र सनैया–४१ स्थित क्यूटीसीटी क्याम्प लगायतमा प्रस्तुति दिएको सिस्नुपानीका महासचिव टंक आचार्यले जनाए ।

प्रस्तुति क्रममा कलाकार मनोज गजुरेलले समसामयिक विषयबस्तुमाथि हास्य व्यंग्य, गायक शिशिर योगीले गीत, योगविद डा. राजुु अधिकारीले स्वास्थ्य, योग र सकारात्मक सोच सम्बन्धी प्याकेज, साहित्यकार लक्ष्मण गाम्नागे, अर्जुन पराजुली, धीरेन्द्र प्रेमर्षि र टंकराज आचार्यले हास्य कविता, मुक्तक र गजल लगायतको कोसेली पस्केको महासचिव आचार्यले जनाए । ‘हरेक कार्यक्रममा चार–पाँच सय नेपाली भेला भएका थिए,’ अध्यक्ष लक्ष्मण गाम्नागेले भने, ’हामी काम गरेको थलोमै पुग्दा उहाँहरू घरकै सदस्यसित भेटघाट भएको जस्तै खुशी हुनु भयो । हामी लेखक–कलाकारका लागि यस्तो क्षणमा निकै ऊर्जावान् महसुस हुँदो रहेछ ।’

काठमाडौंको इस्लिङटन कलेज, श्रम मन्त्रालय, प्रभु बैंक, आइएलओ लगायतका संघसंस्थाको सहकार्य रहेको कार्यक्रमलाई अभियानकै रुपमा अघि बढाउने सिस्नुपानीले जनाएको छ । नेपाली राजदूतावासहरू, गैरआवासीय नेपाली संघ र प्रवासस्थित बिभिन्न नेपाली संघ संस्थाहरूसंगबाट सोचे भन्दा बढि सदभाव र सहयोग मिलेको महासचिव आचार्य बताए । सकारात्मक सोच र जीवनशैली, हास्ययोग, देशप्रेम, पर्यटन प्रवर्द्धनजस्ता बिषयमा केन्द्रित रही हास्यव्यङग्य, गीत, कविता, प्रहशन प्रस्तुत गरिएको कार्यक्रम छिटै मलेसिया, बहराइन, कुवेत, दक्षिण कोरिया लगायतको मुलुकहरूमा समेत लैजाने आचार्यले जनाए ।

कान्तिपुर, माघ १९, २०७२