नेपाली हास्यव्यङ्ग्य अनलाइन पत्रिका

गर्छन् नौला सहमति सधैँ खानका निम्ति नेता
गाईजात्रा गतिविधि नयाँ गर्नुगर्छन् विजेता । {{read_more}}
मौका छोपी मति–विमतिमा भर्नुभर्छन् छ थैलो
खाँदा मात्रै सहमति गरे हुन्छ नेपाल पैलो ।

साना–ठूला प्रतिनिधि मिली गर्दछन् भाँडभैलो
बोल्छन् मात्रै सहमतिसँगै भर्दछन् थाल–थैलो ।
तानातानी तुजुक भरिलो जान्छ खोलेर दैलो
यस्तै चालासित अघि बढे हुन्छ नेपाल पैलो ।

जानीजानी कति घर भए उच्च आकाश तुल्य
हानहानी पनि हुन गए बन्छ नेता अमूल्य ।
हाकाहाकी लिन–दिन हुने खेल खेलिन्छ भैलो
यस्तै चालासित अघि बढे हुन्छ नेपाल पैलो ।

वैलेका छन् सृजन–पथमा तीब्रगामी विवेक
फैलेका छन् मुलुकभरमा घूसखोरी अनेक ।
फैलाएका प्रतिनिधि मिले काठमाडौँ छ मैलो
यस्तै चाला प्रतिदिन रहे बन्छ नेपाल पैलो ।

राता भाले भुटुन, पकुवा मासुमा रम्न थाले
काले–काले मिलजुल गरी जाँडमा जम्न थाले ।
भन्छन् कोही हतपत नयाँ भर्न बाँकी छ घैलो
यस्तो चालासित अघि बढे हुन्छ नेपाल पैलो ।

९८४१४९१०८१, jitaleebam@gmail.com