नेपाली हास्यव्यङ्ग्य अनलाइन पत्रिका

अमर सन्तति :

१.
छिनी बनी दूध जस्तै पूरा फाट्नेहरु
विश्वाससँग धारिलो त्यो छुरा साट्नेहरु
खाने गर्छन् आफ्नो मानो तर कति ज्ञानी !
बसी सित्तै दिन गुजार्छन् कुरा काट्नेहरु ।

२.
अरुलाई हल्का बनाई आफू जोखिने छन्
अरुलाई झूठ खन्याई आफू पोखिने छन्
भोग्दै जाँदा जिन्दगीमा देखिन्छ खै के के ?
अरुलाई दोष लगाई आफू चोखिने छन् ।

३.
सत्य इमान अनौठो र नौलो भएको छ
बधशाला नै पूजा गर्ने मौलो भएको छ
डुँडुलो नै निल्ने चलन बढेकोले अचेल
जोगाउनु पर्ने यहाँ त औँलो भएको छ।

०००
भक्तपुर