नेपाली हास्यव्यङ्ग्य अनलाइन पत्रिका

रमेश समर्थन :

१.
न व्यभिचारी, न भ्रष्टाचारी, न आतङ्ककारीसित डर लाग्छ
न तरवारधारी, न बन्दुकधारी, न लन्चरधारीसित डर लाग्छ
रकेट, ट्याङ्क, तोप, गोला जे जे देखाऊ डर छैन हामीलाई
फूलहरू भन्छन्, ‘हामीलाई त फगत् पुजारीसित डर लाग्छ ।’

२.
उत्तमोत्तम कृतिहरूको बहिष्कारका लागि
गुठीतिर धाउनुपर्छ अब नमस्कारका लागि
कसैले पढून्, नपढून् आफूलाई के मतलब
एउटा किताब छपाउनु छ पुरस्कारका लागि ।

३.
समयले हाहाकारी सङ्गीत बजाउन त बाँकी नै छ
परीक्षकले चुनौतीको प्रश्न बनाउन त बाँकी नै छ
साहसको डोरी अलि बलियोसित बाटेर बस् समर्थन
जीवनमा अझै दुःखको घडी आउन त बाँकी नै छ ।

४.
जीवनलाई जीवनामृत मानेर पिउन खोज्दा
मक्किएका पलहरूलाई रफु गरेर सिउन खोज्दा
‘जा समर्थन, बाँच् आफ्नो जिन्दगी’ भनेन जिन्दगीले
जीवनलाई फगत् जीवनजस्तै बनाएर जिउन खोज्दा ।

५..
दिउँसै अँध्यारो पार्छन् र उज्यालालाई रुवाउँछन्‌
यी ती जनावर हुन् जो कान्जीहाउसमा सुहाउँछन्‌
यी बहुरूपियाहरूको अनुहारमा भर नपर्नुस् महोदय
पहिले खुन बगाउँछन् अनि गोहीका आँसु चुहाउँछन् ।

०००
रुपन्देही
बदनाम आँचल (२०८२)