नेपाली हास्यव्यङ्ग्य अनलाइन पत्रिका

बेलबारी, २०७९/०६/१६ । मोरङ जिल्ला अन्तर्गतको १७ वटा पालिकाहरूमध्ये बेलबारी नगरपालिकाले भाषा, साहित्य, कला, सङ्गीत, नाटक, संस्कृति आदिको संरक्षण, संवर्द्धन र विकास गर्न/गराउन बेलबारी प्रज्ञा-प्रतिष्ठान गठन गरेको छ ।

नगरपालिकाको बेलबारी प्रज्ञा-प्रतिष्ठान ऐन, २०७८ को परिच्छेद २, धारा ३ (१) अनुसार बेलबारीकी साहित्यकार तथा साहित्यिक अभियन्ता रेखा सुवेदी राईको संयोजकत्वमा ११ सदस्यीय तदर्थ समिति गठन गरिएको थियो । बेलबारी नगरपालिकाका प्रमुख दिलप्रसाद राईको अध्यक्षतामा साहित्य, कला, सङ्गीत क्षेत्रका सर्जक-स्रष्टाहरूको भेला गरी उक्त तदर्थ समिति गठन गरिएको थियो ।

शनिवार तदर्थ समितिकी संयोजक रेखा सुवेदी राईको अध्यक्षता, बेलबारी नगर प्रमुख दिलप्रसाद राईको प्रमुख आतिथ्य, बेलबारी नगरपालिकाकी उपप्रमुख नितु थापा कोइरालाको विशिष्ट आतिथ्य, शिक्षा शाखा प्रमुख भूपेन्द्रप्रसाद कोइरालाको आतिथ्यमा बसेको प्रथम वैठकले ऐनको धारा ४ (१) अनुसार दश जना सदस्य थप र कार्यविभाजन गरी प्रज्ञा समितिलाई पूणर्ता दिइएको छ ।

बेलबारी नगरपालिकाका प्रमुख दिलप्रसाद राई प्रमुख संरक्षक, उपप्रमुख नितु थापा कोइराला संरक्षक रहने गरी अध्यक्ष रेखा सुवेदी राई, ५ उपाध्यक्षहरू क्रमशः धनजित पराजुली (भाषा-साहित्य), गणेश तामाङ लामा आँसु (ललितकला-साहित्य), हिमाङ्शु राय (साहित्य), मनकुमार गुरुङ (सङ्गीत-संस्कृति) र अजितकुमार धिमाल (भाषा-अनुसन्धान), सचिव कुलप्रसाद बराल (साहित्य), कोषाध्यक्ष शेखर थापामगर (नृत्य-सङ्गीत) तथा सदस्यहरूमा टेकबहादुर मगर (साहित्य-सङ्गीत), उमा सिजापती (साहित्य), निर्मला गौतम (भाषा-साहित्य), उपेन्द्र राई (नृत्य-चलचित्र), राजु परियार (साहित्य), विकास बुढाथोकी (नाटक), सञ्जीव कटुवाल (साहित्य), प्रेम गुरुङ (साहित्य), लक्ष्मी रेग्मी सुवेदी (भाषा-साहित्य), मेखबहादुर कार्की (सङ्गीत-ललितकला), कलावती खवास (लोकनृत्य-अभिनय), महेन्द गिरी (साहित्य) र रिपुमर्दन खड्का (साहित्य) रहेका छन् ।

उक्त अवसरमा नगर प्रमुख राईले बेलबारी नगरपालिकाको प्रथम प्रज्ञा समितिलाई बधाई तथा शुभकामना दिँदै यस समितिले बेलबारी नगरका भाषा, साहित्य, कला, सङ्गीतको खोज-अनुसन्धान गर्ने, लोकसंस्कृतिलाई पनि प्रकाशमा ल्याउने विश्वास व्यक्त गर्नुभयो ।

०००