नेपाली हास्यव्यङ्ग्य अनलाइन पत्रिका

एल् पी खनाल :

अब मनको कुरा मन मनै किन राख्न पर्‍यो
बह छ भने कुनै तब यतातिर बाँड्न पर्‍यो
अनि तनमा यसै सुमन मग्मग बास चलोस्
तब मनमा खुबै ललित झल्मल दीप बलोस् ।१

वय सयमा अझै तन बलिष्ट सुचारु रहोस्
अटल रहोस् विचार शुभ भाव सुरम्य बनोस्
हित उपदेशमा सबल बन्दछ बृद्ध गुरु
युवक सबेरमै गर सुकर्म सुशान्त सुरु ।२

दिन रमणीय होस् मधुर होस् सुख शान्ति मिलोस्
पथ पगमा नहोस् कहर विघ्न कुनै नपरोस्
खुरुखुरु वृद्धले मन दिएर सुकर्म गरून्
नव नवमा सचेत अनि आशिष कोष भरून् ।३

मथन गरेर हुन्छ सुविचार छ मख्खनझैँ
असल प्रयोगले गुणन बन्दछ त्यो सुनझैँ
मनन गरेर वृद्ध जनका गर आदर रे!
हितकर हुन्छ देश र समस्त समाज भरे ।४

पिर किन हुन्छ लौ न अब वृद्ध भएँछु भनी
पिर लिन हुन्न यो छ जब शाश्वत हो र पनि
निज वयमा ऊ रम्छ अति उत्तम जान सबै
तन मन शान्त बन्छ बल हुन्छ र सोख सधैं । ५

०००
कामपा १६, नयाँबजार काठमाडौं