नेपाली हास्यव्यङ्ग्य अनलाइन पत्रिका

देवीप्रसाद मिश्र :

वृद्ध, चिन्तन

कलिकाे खलियाेभित्र पसेर जनकाे मन ।
मडारिन्छ सदा आज खाेजेर आसुरी धन।। (२७०)

सत्य निष्ठा भुलेकाे छ ठान्छ केवल जीवन ।
वृद्धका भावनामाथि छैन खास समर्थन ।। (२७१)

काग कराउँदै गर्छ पिना सुक्छ भनेसरि।
वास्ता गर्दैन सन्तान बाआमा छन् कठैबरी ।। (२७२)

अनेकाैँ कार्य साँधेर अवकाश छ जीवन ।
तथापि वृद्धमा हेर्दा भित्रभित्र छ क्रन्दन।। (२७३)

बाआमाका कुरा ठान्छ छाेराले सब गन्थन।
आफू प्रबुद्ध हूँ भन्छ हराएर विवेचना।। २७४)

छाेरीकाे मन ठाेकिन्छ बाआमामा सदा तर ।
चाला उस्तै उता हेर्दा शान्त छैन कुनै घर।। (२७५)

आकाङ्क्षा छ सबैसाथ धन दाैलत सञ्चय ।
आफन्तमा बढेको छ धमिलो बाढकाे भय ।। (२७६)

पैसा भए सबै पुग्छ ठान्छ झन् कलिकाे नर ।
माया सद्भाव पैसाले कसरी किन्न मिल्छ र ?। (२७७)

सन्ताेस कसरी झुल्छ वृद्धकाे परिवेशमा।
बुझ्छ खै कसले राम्रो नित्य गर्दै विवेचना ?। (२७८)

लागाैँ जुटेर सन्तान याे सम्बन्धी सबैजना
आफ्नो स्वार्थ भुले मात्र हट्दछन् वृद्धवेदना।। (२७९)
(क्रमशः)

०००