नेपाली हास्यव्यङ्ग्य अनलाइन पत्रिका

टीका आत्रेय :

आँधी हुरी वा असिना पछारी
बाजे बराज्यू युगका चिनारी
सुम्पेर जान्छन् सुनका बिहान
हाेस् वृद्धबेला सुखकाे निसान ।

चट्टान फाेडी जरुवा रसाए
अन्नादि फल्ने पसिना बगाए
हुन् लक्ष्य पुग्ने पथ वा उडान
हाेस् वृद्धबेला सुखकाे निसान ।

जाेतेर हड्डी पटुकी कसेर
खाई नखाई नसुती बसेर
याे विश्व हाँक्ने तिनकाे अडान
हाेस् वृद्धबेला सुखकाे निसान ।

बाेकेर अग्ला हिमका पहाड
पन्छाउँदै जीवन अन्धकार
याे उच्चताकाे रचियाेस् सुगान
हाेस् वृद्धबेला सुखकाे निसान ।

संसार जित्ने अवतार ती हुन्
धर्ती निखार्ने उपचार ती हुन्
त्याे मूल्य बाँचाेस् नसुकाेस् मुहान
हाेस् वृद्धबेला सुखकाे निसान ।

यी शास्त्र भाषा तिनले कुँदेका
संस्कार शैली पनि हुन् बुनेका
बाँचाेस् सधैँ हिम्मत याेगदान
हाेस् वृद्धबेला सुखकाे निसान ।

०००