नेपाली हास्यव्यङ्ग्य अनलाइन पत्रिका

टीका आत्रेय :

न हुन्थ्याे पृथ्वीकाे अनुपम छटा सुन्दर छवि
न खुल्थे धर्तीमा झलल नभका चन्द्र र रवि
बसाए स्रष्टाले प्रकृतिघर भन्ने बरु बुझाैँ
बुबाका आमाका अनुभव सिकी सक्षम बनाैँ ।

लुकाए आँखामा जलनद कुवा ताल तनका
लुकाए छातीमा जलन जति छन् अग्नि मनका
नबिर्साैँ पुर्खाकाे रगत पसिना मर्म नभुलाैँ
बुबाका आमाका अनुभव सिकी सक्षम बनाैँ ।

बनाए चाैतारा बरपिपलझैँ शीतल भए
बने पाटी पाैवा युग सफरकाे लक्ष्य बनिए
उनैका श्रद्धामा शिर निहुरियाेस् कर्म नभुलाैँ
बुबाका आमाका अनुभव सिकी सक्षम बनाैँ ।

उनैका न्यानाेमा रविकिरणका विम्ब उनिए
उनैका वीणामा ऋतु रसिकका गीत बुनिए
सुसेलामा सङ्लाे लयहृदयकाे सप्तक सुनाैँ
बुबाका आमाका अनुभव सिकी सक्षम बनाैँ ।

पखेटामा च्यापी पवनपथकाे रक्षक बने
उनैका गाेडाले हिमशिखरका अक्षर चिने
बचाओैँ पुर्खाका असल गरिमा मन्थन गुनाैँ
बुबाका आमाका अनुभव सिकी सक्षम बनाैँ ।

०००