नेपाली हास्यव्यङ्ग्य अनलाइन पत्रिका

कल्पना अधिकारी भट्टराई :

उचाल्न राष्ट्रको ध्वजा अमूल्य देन दिन्छ जो।
सहायता गरून् सदा युवा समस्त वीरको।
नहून् कदापि वृद्ध यी खराब दुष्ट घातक।
विवेक बुद्धिमा चलून्, बनेर वृद्ध तारक ।१।

विचारले चिरून् सबै घमन्डका जराहरू।
विकासले हराभरा बनून् गरा-गराहरू।
समाजका र राष्ट्रका बनून् सधैँ सुधारक ।
विवेक बुद्धिमा चलून्, बनेर वृद्ध तारक ।२।

कुभावले कुतर्कले लिँदैन देशले गति।
सुभावले सुतर्कले हुनेछ राष्ट्र उन्नति।
सुशान्ति निम्तिमा खटून् समान एक सैनिक
विवेक बुद्धिमा चलून्, बनेर वृद्ध तारक ।३।

सुझाव विज्ञले दिँदा सुमार्ग खुल्छ सार्थक।
युवा अगाडि बढ्दछन् अवश्य बोधपूर्वक।
घना घनान्धकारको भएर मार्गदर्शक ।
विवेक बुद्धिमा चलून्, बनेर वृद्ध तारक।४।

नयाँ नयाँ विकासका विकल्प जो सिकाउँदै।
छ सत्य के असत्य के सबै कुरा बुझाउँदै ।
चिनून् समस्त लोकले भनी विशिष्ट साधक
विवेक बुद्धिमा चलून्, बनेर वृद्ध तारक।५।

०००